د اسلامي امارت ویاند مولوي ذبیح الله مجاهد العربیه خبري شبکې سره مرکه کې ویلي، اسلامي امارت له امریکا سره د رسمي ډيپلوماټیکو اړیکو غوښتونکی دی.

ښاغلي مجاهد ویلي، اسلامي امارت بېلابېلو هېوادونو سره ډيپلوماټیکې اړیکې جوړې کړې، چې د کابل او واشنګټن ترمنځ اړیکې به دواړو هېوادونو په ګټه وي.

نوموړي زیاته کړې، افغانستان نورو هېوادونو سره د اړیکو د پیل لپاره هيڅ ډول شرایط نه دي وضع کړي.

مجاهد له ګڼو نورو هېوادونو غوښتي، چې افغانستان سره د سیاسي، اقتصادي او سوداګریزو اړیکو پیل لپاره رامخکې شي.

دغه څرګندونې داسې مهال مطرح کیږي، چې وروستیو کې د اسلامي امارت له لوري د امریکایي زنداني تر خوشي کېدو وروسته غربي هېوادونو سره د ډيپلوماټیکو دروازو د پرانېستلو هیلې هم زیاتې شوې دي.