له افغان شخصيتونو سره د تماس کمېسیون د دارالانشأ رئيس مولوي ذاکر الله ذاکر په سپېدار ماڼۍ کې د تېرې ادارې د ولسي جرګې له یو شمېر وکیلانو سره کتلي دي.

یاد کمېسیون ویلي، چې دې کتنه کې د تېرې ادارې وکیلانو وویل، چې هېواد کې په ډاډ زړه مېشت دي.
د افغانستان بېلابېلو ولایتونو څخه راغلو یادو وکیلانو همداراز ویلي، چې افغانستان مو خپل کور او اسلامي امارت مو خپل نظام دی. 
دې کتنه کې دوی زیاته کړې، چې بهر ته د تګ او وطن پرېښودلو اراده نه لري.

یاد کمېسیون پر اېکس پاڼه ویلي، چې دې کتنه کې مولوي ذاکرالله ذاکر یادو وکیلانو ته وویل، چې افغانستان د ټولو افغانانو ګډ کور دی او هیڅوک دې په کې د پردیتوب احساس نه کوي.

نوموړي زیاته کړې، چې د اسلامي امارت ټول مشران او مسؤلین د هېواد د ابادۍ، پرمختګ او خودکفایۍ لپاره هڅې کوي او اړتیا ده چې ټول افغانان په یوه ټغر د هېواد د ابادۍ له کاروان سره یو ځای شي.

د اسلامي امارت یاد چارواکي د تېرې ادارې پارلمان غړو ته ډاډ ورکړی، چې کتنه کې مطرح شویو ستونزو ته به رسېدګي وشي.

د یادونې وړ ده، چې افغانستان اسلامي امارت بیا حاکمیت وروسته د تېرې اداې ټولو نظامي او ملکي چارواکو او منسوبینو ته عفوه وشوه، چې اوس نږدې ټول افغانستان کې په ډاډه او خوندي ډول له خپلو کورنیو سره ژوند کوي.