د واشنګټن او اسلام اباد نوې معامله، بلوڅ ازادي غوښتونکي نور ترهګر دي
د امریکا حکومت د پاکستان بلوچستان کې د بلوڅ ازادي غوښتونکې ډله د بهرني ترهګرو سازمان په توګه ونوموله او له دې پرېکړې د اسلام اباد حکومت هرکلی کړی.
اسوشتېد پرېس خبري اژانس راپور ورکړی، دا پرېکړه وروسته له هغې وشوه چې د پاکستان پوځ مشر عاصم منیر امریکا ته سفرونه وکړل.
د امریکا له لوري دا پرېکړه دوه اونۍ وروسته له هغې شوې، چې امریکا او پاکستان سوداګریزې هوکړې ته رسېدلي چې له مخې به یې امریکايي شرکتونه اجازه ولري، چې بلوچستان کې طبیعې زېرمې استخراج کړي.
ځینو سیاسي شنونکو پر دې پرېکړه نیوکه کړې او ویلي یې دي، چې امریکا تل هغه ډلې د ترهګرو سازمانونو په توګه پېژندلي چې د خپلو مشروع حقونو د دفاع لپاره مبارزه کوي.
دا په داسې حال کې ده، چې بلوڅ ازادي غوښتونکو لخوا د پاکستاني پوځ پر وړاندې بریدونه زیات شوي او په یوه تر ټولو خونړي برید کې دې ډلې له ۲۵۰ څخه ډیر پاکستاني سرتېري ووژل.
