د ایران ولسمشر مسعود پزشکیان تازه ویلي، چې زموږ د بهرني سیاست لومړیتوب باید له ګاونډیانو سره د اړیکو پراخول وي.

نوموړي زیاته کړې، زه د دې لپاره چمتو یم چې افغانستان ته سفر وکړم، څو د دواړو هېوادونو ترمنځ د اړیکو په تاریخ کې نوې پاڼه پرانېزو.

د ایران ولسمشر دا تازه څرګندونې کابل کې د ایران سفارت پر اېکس ټولنیزې رسنۍ خپرې کړې دي.
یاد سفارت ویلي، چې مسعود پزشکیان دا خبرې د ایران بهرنیو چارو وزارت چارواکو سره په ناسته کې کړې دي.

د یادونې وړ ده، چې د ایران ولسمشر په داسې حال کې افغانستان ته د سفر خبره کوي، چې تېرو څو اونیو کې ایران سلګونه زره افغان کډوال په جبر کډوالۍ ته اړ کړل او دا لړۍ لا روانه ده.