د پاکستان مذهبي چارو وزیر سردار محمد یوسف په تازه څرګندونو کې ویلي، شاوخوا ۴۰ زره  پاکستاني وګړي چې ایران، عراق او سوریې ته د زیارت کولو په موخه تللي دا مهال ورک دي.

 د امریکا له ملاتړه یوې برخمنې رسنۍ د خپلو سرچینو له قوله ویلي، دغه لوی شمېر تللي پاکستاني وګړو یا سوال شروع کړی یا هم اروپا ته تللي دي.

 یاد پاکستاني چارواکی یې په تړاو زیاته کړې، دغه کسانو له ټاکلې مودې زیات وخت تېر کړی او پاکستاني حکومت یې په تړاو معلومات نه لري.

 نېشن پاکستانۍ ورځپاڼې دغه راپور خپور کړی او زیاته کړې ده، چې یاد پاکستاني چارواکي دغه څرګندونې د یوه کنفرانس په مهال وکړې او د دا ډول پېښو د مخنیوي لپاره یې د یوه منظم سیستم پر جوړېدو ټینګار کړی.

 راپور کې راغلي چې نوموړي د خبرو په مهال دا هم ویلي، چې ایران، عراق او سوریه د یادو شاوخوا ۴۰ زره هغو پاکستاني وګړو چې موخه یې زیارت کول وو د ورکېدو په اړه ورسره اندېښنې شریکې کړې دي.

 تر دې وړاندې هم د سعودي عربستان په ګډون عراق او یو شمېر نورو هېوادونو له پاکستاني کډوالو سر ټکولی و او زیاته کړې وه، چې لوی شمېر سوالګر یې د ښار نظم ور ګډوډ کړی او هڅه کوي له خاورې یې وباسي.

 رسنیو هغه مهال ویلي و، د سعودي عربستان او عراق دغه پرېکړه کې ډېری د پنجاب اوسېدونکي وو.