کورنیو چارو وزارت په یوه خبرپاڼه کې ویلي، چې په تیرو ۲۴ ساعتونو کې امنیتي منسوبینو ۲۶ تنه په کاپیسا، تخار، کندهار، غزني او فاریاب ولایتونو کې د بیلابیلو جرمونو په تړاو نیولي.

یاد وزارت زیاته کړې، چې دغه کسان د غلا، نشه یي توکو استعمال، ناقانونه وسلو ګرځولو او د ځینو نورو جنایي جرمونو په تور امنیتي ځواکونو نیولي دي.

په ورته مهال په دې تړاو په خپره شوې خبرپاڼه کې زیاته شوې، چې ۱۱ تنه په ارزګان کې د غلا په تور، ۶ تنه په کاپیسا کې د نشه يي توکو د کارولو په تور ، ۵ کسه په تخار کې له کورنو د غلا په تور، کندهار کې یو تن د ۸۰ زره افغانیو د غلا او یو تن د نشه یي توکو د پلور په تور او یو تن په غزني کې د غلا په تور نیول شوي دي.

دغه راز کورنیو چارو وزارت زیاته کړې، چې د ارزګان په ګیزاب ولسوالۍ کې آمنیتي منسوبینو څه اندازې وسلې او مهمات هم کشف او نیولي دي.