اسلام اباد ته د افغان حکومت مشوره؛
د پاکستان وضعیت له نږدې څارو؛ نارضا ولس سره معقول چلند وکړئ

د افغانستان اسلامي امارت ګاونډي پاکستان هېواد کې د حکومت او سیاسي مخالفينو د پلويانو ترمنځ ترينګلتيا د اندېښنې وړ بللې او ویلي یې دي، چې پر ټوله سيمه منفي اغېز لرلای شي.

افغان حکومت پاکستاني حکومت ته وریاده کړې، چې د ولس د مشروع غوښتنو پر وړاندې تر ټولو ښه لار مذاکره او تفاهم دی.
د افغان حکومت اعلامیه کې ویل شوي، چې پاکستان کې وروستيو پېښو ثابته کړې چې له مذاکراتو انکار مسئلې لا پېچلې کوي.

د افغانستان اسلامي امارت همداراز ویلي، چې موږ د پاکستان وضعیت له نږدې څارو او هيله من يوو چې د پاکستان حکومت او تأثيرګذاره ادارې له زياتېدونکې نارضايتۍ سره معقول او واقعبین چلند وکړي.

افغان حکومت دا اعلامیه داسې حال کې خپروي، چې پاکستان پلازمېنه کې د عمران خان د پلویانو له لوري له درېیو ورځو راهیسې لاریونونه روان دي، چې ګڼو پولیسو ته مرګ ژوبله کې اوښتې او لاریونونه په تاوتریخوالي اوښتي، چې د اسلام اباد امنیت پاکستاني پوځ ته سپارل شوی.

د یادونې وړ ده، چې دې له تاوتریخوالي ډکو لاریونونو داسې حال کې زور اخیستی، چې ټاکل شوې په اسلام اباد کې شانګهای سازمان ۲۳مه غونډه د اکټوبر پر ۱۵ مه پیل شي.