د حماس جهادي غورځنګ د سیاسي دفتر مشر یحیی السنوار د یمن حوثي ځواکونو مشر عبدالمالک الحوثي او حزب الله لبنان ته په لېږلي لیک کې ویلي، د طوفان الاقصی عملیات د صهیونیستي اشغالګر رژيم پروژې د ځپلو لپاره په فلسطین او سیمه کې پیل شوي دي. 

حزب الله رسنیز دفتر د السنورا دغه پیغام خپور کړی، چې تهران کې د اسماعیل هنیة تر شهادت وروسته د ځای ناستې په توګه د یحیی السنوار تر ټاکل کېدو یوه میاشت وروسته د لبنان حزب الله مشر حسن نصرالله، د الجزایر د ولسمشر عبدالمجید تبون او د یمن حوثي ځواکونو مشر عبدالمالک الحوثي ته استول شوی دی. 

السنوار دغه لیک وروسته له هغې استولی، چې حوثي ځواکونو د غزې د مقاومت او ملاتړ په موخه د مرستندویه عملیاتو پنځم پړاو اعلان کړ. 

دې لیک کې عبدالمالک ته ویل شوي، «د صهیونیستي رژیم منځ ته ستاسو د راکټونو د رسېدلو مبارکي وایم، هغه راکټونه چې د اسرائیلو  دفاعي ځواک او اعتراضي سیسټمونه یې وننګول.» 

ښاغلي سنوار ټینګار کړی، چې دا عملیات به د طوفان الاقصی معرکې ځلا لا نوره روښانه او د تل ابیب په زړه کې به یې اغېزه بیرته رابرسېره کړي. 

سنوار ویلي، «دې عملیاتو دښمن ته قوي پیغام ولېږه، چې د مهارولو او خنثی کولو پلانونه ناکام شوي، د ملاتړو جبهو اغېز د جګړې په دګر کې قوي او اغېزمن لوري ته روان دی.» 

نوموړي زیاته کړې، له یمن، لبنان او عراق سره یې ګډې هڅې به د دښمن د ماتې او د اشغالي فلسطین څخه د وتلو لامل شي. 

سنوار د غزې وضعیت په اړه ویلي، فلسطیني خلک له نسل وژنې، محاصرې او قحطۍ سره مخ دي چې د امت ملاتړ ته اړتیا لري.

نوموړي له نږدې یو کلنې دوامداره جګړې وروسته د جهادي مقاومت وضعیت ښه بللی په خبره یې، هغه خبرونه، دښمن یې خپروې د رواني جګړې برخه دي. 

هغه ټینګار کړی چې مقاومت د اوږد مهاله او سختې جګړې لپاره چمتو دی او د دښمن سیاسي اراده به هم داسې ماته کړي، لکه څنګه چې یې د هغوی نظامي اراده ماته کړې.