کندهار کې ۶۰ زره جریبه ځمکه له غاصبینو بیرته راګرځول شوې
د کندهار ولایت د کرنې، اوبو لګولو او مالدارۍ ریاست مسئولین وایي، په کندهار کې د غصب مخنیوي د تخنیکي پلاوي له پیله تر دې دمه د کندهار په بېلابېلو برخو کې ۶۰زره جریبه ځمکه له غصب څخه راګرځول شوې.
د یاد ریاست ویاند ننګیالي سمون حریت نیوز ته ویلي، د کرنې ریاست له لوري د شاولیکوټ ولسوالۍ د بوري او ګرماو په کلي کې تازه ۲۵ جریبه دولتي ځمکه له زورواکو او غاصبینو څخه راګرځول شوې ده.
ښاغلي سمون زیاته کړې، د غصب شویو ځمکو مخنیوي پروسه به تر هغې دوام وکړي، تر څو چې په بشپړه توګه دولتي ځمکې له غاصبینو څخه نه وي را ګرځول شوې.
