د کورنیو چارو وزارت وایي، د تامیناتي چارو مرستیالۍ د حمایوي قومندانۍ تخنیکي مرکز په وروستیو دوو کلونو کې ۳۸ زره  او ۲۵۳عرادې بېلابېل ډوله نظامي وسایط رغولي دي.

د حمایوي قومندانۍ مرستیال مولوي عبدالستار وایي، د دې قومندانۍ منسوبین توانېدلي چي په دې موده کې ۷زره او ۹۰۰ میله بېلابېلې سپکې او درنې وسلې هم ورغوي او د پولیسو د خدمت جوګه شي.

بلخوا د دې ورکشاپونو مسئولین وایي، هغه وسلې او نظامي وسایط چې تخنیکي ستونزې لري د کورنیو چارو وزارت له قطعاتو او جزتامونو څخه راټولېږي او د حمایوي قومندانۍ ورکشاپ ته د ترمیم په موخه راوړل کېږي.

دا په داسې حال کې چې د اسلامي امارت له بیا واکمنېدو وروسته تخنیکي ټیمونو د هېواد په ټولو نظامي مرکزونو کې د هغو نظامي وسایطو او وسلو ترمیم او بیا رغونې ته ملا تړلې، چې تېري ادارې پر مهال تخریب شوي وو.