د عامې روغتیا وزارت خبر ورکړی، چې په فراه ولایت کې د شاوخوا ۳۵۰ زره امریکايي ډالرو په لګښت یو نوی (OPD) روغتیايي مرکز جوړ او پکې د روغتیايي خدماتو وړاندې کېدل پیل شول.

وزارت زیاتوي، چې دغه روغتیايي مرکز، چې په ټولو اړینو تجهیزاتو سمبال دی د فراه ولایت د انار درې ولسوالۍ په ذهن کن کلي کې جوړ شوی دی.

وزارت ویلي، چې دغه مرکز د یو ملي پانګوال له لوري جوړ شوی او په معیاري بڼه به د سیمې خلکو ته پکې روغتیايي خدمات وړاندې کیږي.

بلخوا د عامې روغتیا وزارت د جوزجان ۲۰۰ بستریز روغتون ته د ۵۰ زره ډالرو په ارزښت د ۵ ډوله مهمو بېلابېلو تجهیزاتو د سپارل کېدو خبر هم ورکړی دی.

د یادونې وړ ده، چې د اسلامي امارت بیا حاکمیت را وروسته لرو پرتو او هغه سیمې چې له روغتیايي خدماتو بې برخې وې هلته روغتیايي مرکزونه جوړ شوي او خدمات په کې پراخ شوي دي.