د روسیې او اوکرایین ترمنځ د جګړې له زور اخېستو سره سره دواړو خواوو استازي نن د ترکیې استانبول کې د خبرو دویم پړاو ته سره کیني.

رویټرز خبر ورکړی، چې دغو خبرو کې د اوکرایین پلاوي مشري د یاد هېواد دفاع وزیر رستم عمروف او د روسیې له لوري د کرملین سلاکار ولادیمیر میدیسنکي کوي.

دغو خبرو کې د اروپا او امریکا استازي هم ګډون لري.

رویټرز په خپل راپور کې ویلي، سره له دې چې روسیه او اوکرایین د سولې په اړه خبرې کوي، خو لا هم له یو بل سره واټن لري.

دغه خبرې وروسته له هغې پیلیږي، چې اوکرایین د روسیې خاوره کې دننه څلور پوځي اډې په نښه کړې، او د ۷ میلیارده ډالرو زیان اړولو ادعا یې کړې ده.