د یمن المسیره خبري شبکې خبر ورکړی، چې د امریکا ولسمشر ډونالډ ټرمپ له لوري د تېري شپې برید نشر کړې ویډیو ښيي چې دې بریدونو کې ډېری قربانیان ملکي وګړي دي.

یادې شبکې د دې خبر په خپرولو سره ویلي، د برید موخه یوه نظامي راټولېدنه وه، خو د اوسېدو یو سیمه په کې په نښه شوې، چې ملکي وګړو هم شتون درلود.

په ورته مهال د حوثیانو نظامي ویاند یحیی سریع په یوه ټلوېزیوني وینا کې چې المسیره شبکې خپره کړې د امریکا دغه برید غندلی او هغه یې «د امریکا په تورو کارنامو کې یو بل جنایت» یاد کړی دی.

ښاغلي سریع زیاته کړې، د امریکا ولسمشر له لوري د دې ویډیو خپرول او پرې ویاړ کول د دې ښودنه کوي چې «جنایت او وحشت د امریکا عادت» دی.

دغه څرګندونې داسې مهال مطرح کېږي، چې تېره ورځ ټرمپ په خپله ټولنیزه رسنۍ تروت د یوې ویډیو په خپرولو سره ادعا وکړه، چې امریکایي ځواکونو د حوثي ځواکونو یوه راټولېدنه په نښه کړې ده.