دا له شاوخوا شپږ میاشتني ځنډ وروسته یو ځل بیا د دواړو هېوادونو ترمنځ د سفارتي اړېکو نوی پړاو دی چې نن پنجشنبه پيل شو.

د روسیې ټاس خبري اژانس د خبر له مخې د واشنګټن لپاره د مسکو نوی سفیر الکساندر دار چیف دی چې دروسیې په سیمه ییز وخت نن پنجشنبه د واشنګټن ډالس نړېوال هوايي ډ‌ګر کې ښکته شو.

الکساندر دارچیف وړاندې تر دې د روسیې په بهرنیو چارو وزارت کې دنده پرمخ وړه.

د دواړو هېوادونو ترمنځ سیاسي اړېکې د امریکا د تېر ولسمشر جوبایډن ادارې پر مهال خړې پړې شوې چې د ټرمپ په مشرۍ نوې ادارې له راتګ وروسته دواړو هېوادونو یې د بیا رغولو په موخه په ریاض او انقره کې ناستې وکړې.

شنونکي وايي، د امریکا له هغه هڅو وروسته چې غوښتل یې د اوکرایین له لوري پر روسیې فشار راوړي او خپلې موخې د جګړې له لارې ترلاسه کړي ونه توانېد خو د خپلو ګټو د خوندیتوب لپاره یې د اوکرایین ملاتړ پرې کړ او له روسیې سره ډیپلوماتیکه لاره غوره کړه.

یاده دې وي، چې روسیې له تېر اکتوبر راپدېخوا په واشنګټن کې سفیر نه ‌درلود.