نړيوالو رسنيو خبر ورکړی، چې امریکا د احمد الشرع په مشرۍ د سوريې په لنډمهالي حکومت نوي شرطونه ايښي، چې د نړيوالو اړيکو برخه کې په دې حکومت لا ډېر فشارونه واردوي. امريکا څه موده وړاندې هم له سوريايي دولته دې ته ورته غوښتنې کړې وې.

د «مانيټور» وېبپاڼې له راپور سره سم امريکا په نويو غوښتنو کې له سوريايي دولته غوښتي، چې د «حماس» او «الجهاد الاسلامي» په ګډون د فلسطين له ټولو جهادي ډلو سره اړيکې وشکوي، د ايران سپاه پاسداران د ترهګرې ډلې په توګه اعلان کړي، سوريه کې د امريکا د نظامي شتون او د داعش په له منځه وړو کې د امريکايي سرتېرو د دندو علني ملاتړ وکړي، د سوريې دننه د ترهګرو شخصيتونو په ضد د امريکا د هدفي وژنو په حق اعتراف وکړي او په «الهول» پنډغالي کې د ايسارو خلکو مسووليت په غاړه واخلي؛ هغه قضيه چې يوه پېچلې امنيتي او بشري ننګونه بلل کېږي.

له دې وړاندې رويټرز خبري اژانس د هغو غوښتنو اړوند خبر ورکړی و، چې سوريې او شام لپاره د امريکا د بهرنيو چارو وزارت استازې نتاشا فرانسيشي د دې هېواد د بهرنيو چارو له وزير اسعد الشيباني څخه د مارچ په ۱۸ مه د بروکسل کنفرانس کې کړې وې.

په دې غوښتنو کې د سوريې دننه د کېمياوي وسلو ټولې ذخيرې له منځه وړل، د ترهګرۍ ضد جګړه کې له واشنګټن سره بشپړه همکاري، د سوريې د نوي حکومت په کليدي بستونو کې د بهرنيو وګړو نه ګومارنه او سوريه کې له ۱۰ کالو راهيسې د بې درکه امريکايي خبريال اسټن ټيس قضيه کې د اړيکو د ځانګړي همغږي کوونکي ټاکل شامل وو.

د سوريې نوی حکومت په داسې حال کې د امريکا له لوري له ننګونو سره مخ کېږي، چې د احمد الشرع په مشرۍ د دې حکومت مشرتابه واک ته له راسېدو راهيسې په خپل دريځ کې خورا نرمي ښيي او له دې لارې د نړيوال مشروعيت د لاسته راوړو هڅې کوي. شنونکي په دې اند دي، چې دا يوازې يو پيل دی او په راتلونکې کې به امريکا د دې غوښتنو او شرطونو کړۍ نوره هم تنګه کړي، په ځانګړي ډول که د سوريې د راتلونکې په اړه د نړۍ زبرځواکونه سره په سيالۍ شي.