د ایران د سپاه پاسدارانو عمومي قوماندان حسین سلامي د امریکا د ولسمشر ډونالډ ټرمپ څرګندونو په غبرګون کې ویلي، ایران به هر ډول ګواښ ته سخت ځواب ورکړي.

نوموړي دغه خبرې تېره ورځ د ایران اړوند ارومیه ښار حمزه سیدالشهداء مرکزي قوماندانۍ لپاره د نوي قوماندان د معرفي په مراسمو کې کړي دي.

نوموړي یو شمېر هېوادونو په ځانګړي ډول افغانستان کې د امریکا ماتې ته په اشارې ویلي، جګړو تل امریکا ته درانه زیانونه او په لویه کچه مرګ ژوبله ور اړولې، خو دوی لا هم د دې غلطې ستراتیژۍ په دوام ټینګار کوي.

تر دې وړاندې هم د ایران مذهبي مشر خامنه اي د ټرامپ څرګندونې د خلکو او عمومي افکارو فریب بللی و او په وړاندې یې توند غبرګون ښودلی و.

ایراني چارواکي داسې مهال د ټرمپ څرګندونو ته غبرګون ښيي چې نوموړي څو ورځې وړاندې له تهران څخه غوښتي و، چې واشنګټن سره د اټومي پروګرام په اړه مخامخ خبرو ته چمتو شي کنه نظامي اقدامات یې حل لاره ده.