د اشغالګر اسرائیلو کابینې غزې کې د اوربند هوکړه تصویب کړه
د اسرائیلو کابینې تېره ورځ جمعه تر یوه اوږده بحث وروسته له حماس جهادي غورځنګ سره غزه کې د اوربند ټینګېدو او یرغملو د تبادلې ته مثبته رایه ورکړې.
د دې هوکړې له مخې به سبا یکشنبه د جګړې د دواړو لوریو ترمنځ اوربند ټینګ او د بندیانو لومړۍ تبادله به ترسره شي.
دا په غزه کې له تېرو ۱۵ میاشتو خونړۍ جګړې وروسته لومړی ځل دی چې د حماس او اشغالګر اسرائیلو ترمنځ اوربند کېږي.
د دې اوربند په لومړي پړاو کې به ۶ اونۍ اوربند ټینګ او حماس به د اسرائیلو ۳۳ یرغمل شوي ازادوي.
دغه راز د اسرائیلو د ۳۳ بندیانو خوشي کېدو په بدل کې به اسرائیل هم سلګونه فلسطیني بندیان خوشي او غزې ته په رسول کېدونکو مرستو کې به زیاتوالی راولي.
د اوربند دویم پړاو کې د شخړي بشپړ اواري، غزې څخه اسرائیلو پوځ په بشپړ وتل او د پاتي یرغملو د خوشي کولو په چارو به خبرې کېږي.
همداراز هوکړې له مخې به درېیم او وروستي پړاو کې د غزې د بیارغونې او هلته په حکومتي او امنیتي چارو خبرې کېږي.
غزه کې د ۲۰۲۳ کال د اکتوبر په ۷مې نېټې جګړه پیل شوه، په همدې موده کې د اسرائیلو په پرلپسې او ړندو بمباریو کې د ښځو او ماشومانو په ګډون تر ۱۵۰ زره زیاتو فلسطینیانو ته مرګ ژوبله واوښته.
