پاکستاني ډرون الوتکو خوست او ننګرهار کې ملکي وګړي په نښه کړي
د ننګرهار رسنیو دفتر ویلي، د شینوارو ولسوالۍ اړوند ۲۸مې ویالې سیمه کې تېره شپه پاکستاني ډرون الوتکو د شاه سوار په نوم یوه بېوزله ملکي وګړي په کور دوه بریدونه کړي، چې له کبله یې درې ماشومان او یوه مېرمن ټپيان شوي.
د ټپیانو روغتیایي وضعیت د ډاډ وړ بلل شوی.
د ننګرهار مرستیال والي مولوي عزیزالله مصطفی ویلي، دا ډول کړنې به د سیمې ثبات اغېزمن کړي.
ها خوا خوست څخه راپورونه وایي، چې پاکستاني ډرون الوتکو تېره شپه یاد ولایت کې ډیورنډ فرضي کرښې ته څېرمه سپلګین سفره کلي کې د محمدنعیم په نوم قومي مشر کور بمبارد کړی، چې دوه ماشومان په کې شهیدان شوي.
د یادونې ده، چې پاکستاني رژیم تر دې وړاندې هم د افغانستان په یو شمېر ولایتونو کې د پاکستاني طالبانو په پلمه د عامو خلکو کورونه بمبارد کړي او مرګ ژوبله یې اړولې.
