مالیې وزارت د اسلامي امارت مشرتابه د فرمان په اساس د تقاعد حقونو منظم مهالوېش سره سم د متقاعدینو حقونو د ورکړې لړۍ پیل کړه.

یاد وزارت په خپره کړې خبرپاڼه کې ویلي، متقاعدینو ته د منظم مهالوېش له مخې د ملکي او نظامي متقاعدینو حقوق د ځانګړې محکمې او اړوند ادارو سره په همغږۍ  د تقاعد حقونو عمومي ریاست کې د ګډ کاري مرکز له لارې د اسنادو طي مراحل پروسې تر بشپړېدو وروسته اجرا کړي.

خبرپاڼه کې راغلي، چې د لومړي پړاو لیست کې سر له ننه د یوې میاشتې په موده کې د سټنډرډ ملي ادارې، پېښو سره د مبارزې ملي ادارې، بدني روزنې او سپورټ عمومي ریاست، شهیدانو او معلولینو چارو وزارت، اداري اصلاحاتو او ملکي خدمتونو خپلواک کمېسیون، چاپېریال ساتنې ملي ادارې، د ارګ ساتنې عمومي ریاست، د ملي امنیت شورا دفتر او اقتصاد وزارت متقاعدینو ته حقوق ورکړل شي.

د یادونې ده، چې د پاتې ادارو مهالوېش به د لومړي پړاو تر بشپړېدو وروسته د روانې وږي میاشتې په ۲۵مه نېټه اعلان شي.