د ریاست الوزراء اقتصادي معاونیت خبر ورکړی، چې افغانستان دمګړۍ د اوو هېوادونو سره د اوسپنې پټلۍ له لارې نښلول شوی دی.

اقتصادي معاونیت وايي، دا مهال په مستقیم ډول افغانستان د حیرتان اوسپنې پټلۍ له لارې له ازبکستان، د اقینې او تور غونډۍ رېل پټلۍ له لارې له ترکمنستان او د خواف - هرات اوسپنې پټلۍ له لارې له ایران سره وصل شوی دی.

یاده حکومتي اداره زیاتوي، چې هېواد په غیري مستقیم ډول له چین، ترکیې، روسیې او قزاقستان سره هم نښلول شوی دی.

اقتصادي معاونیت همداراز ډاډ څرګندوي، چې اسلامي امارت د اوسپنې پټلۍ شبکو پراختیا او بیارغونې ته ځانګړې پاملرنه کړې ده.

د یادونې وړ ده، چې اسلامي امارت هڅه کوي، افغانستان د سیمې او نړۍ هېوادونو سره د اوسپنې پټلۍ له لارې وصل کړي، چې دې برخه کې څو پروژې پلې او ځینې د پلي کېدو په حال کې دي.