ارګ خبر ورکړی، چې د ریاست الوزراء مقام د دفتر عمومي رئیس ډاکتر ملا عبدالواسع نن غرمه د اهل تشیع علماوو او متنفذینو یو شمېر استازو سره په ارګ کې کتلي دي.

ارګ وايي، چې سید صوفي ګردېزي، سید حسن شریفي بلخابي او محمد اسحاق صفدري د نورو په استازیتوب خبرې کړې او د اسلامي امارت او ولسونو ترمنځ نږدې اړیکې او همغږي یې ستایلې ده.

دوی ویلي: (( اهل تشیع د اسلامي نظام بشپړ ملاتړ او اطاعت کوي، ورسره نېک روابط لري او تر سیوري لاندې یې په ښه تفاهم او تعامل په ژوند خوښ دي.))

دې کتنه کې د اهل تشیع استازو خپل مشخص وړاندیزونه او ستونزې په لیکلې بڼه ارګ سره شریکې کړې دي.

بلخوا ملا عبدالواسع دوی ته ویلي، چې ارګ د ټولو افغانانو شریک کور دی او د اسلامي امارت رهبري د ټولو ستونزو او وړاندیزونو ته رسېدګي خپل مسؤلیت بولي.

د یادونې وړ ده، چې د اسلامي امارت چارواکو تل د هېواد ټولو اوسېدونکو سره د یو شان چلند ټینګار کړی او وايي، چې د هېواد ټولو وګړو ستونزو ته یې بې له توپیره رسېدنه کړې.