د کونړ ولایت ناړۍ ولسوالۍ ولسوال امین الله شهاب حريت راډيو ته وايي، چې له درېيو ورځو راهېسې د ناړۍ اړوند د ناوې خوړ په ځنګل کې اور لګېدلی او د سختو بادونو له امله اور په تېزۍ سره خپرېږي.

یاد ولسوال زیاتوي، چې د سیمې خلک او د ولسوالۍ د کرنې مامورین سیمې ته د اور وژنې لپاره رسېدلي خو په خبره یې چې دوی د اور وژنې وسایل نه لري او د نورو سیمو نه ولسي خلک د اور د کابو کولو لپاره ور روان دي.

د ناړۍ ولسوال د یاد ځنګل د اور وژنې لپاره له اړوندو ادارو د مرستې غوښتنه کړې او زیاتوي، دا چې د اور لګېدنې سيمه لرې ده، ولسي لښکر د خوراکي توکو له کمښت سره مخ دی، چې بايد مرستې ور ورسول شي.

نوموړی همداراز وايي، که څه هم تر اوسه د اور لګېدنې علت لا روښانه نه دی خو تر دمګړۍ یې ۱۲ هکټاره ځنګلونه سوځولي او د اور پراخېدو وېره لا په ځای ده.

د یادونې وړ ده، کونړ چې زیاته برخه یې په ځنګلونو پوښل شوې وخت نا وخت په کې دغه ډول پېښې دشپونکو د بې احتیاطۍ له امله رامنځته کېږي.