د افغانستان کورنیو چارو وزیر د حسابي حیرانوونکو مهارتونو له امله وروستیو کې مشهور شوی افغان ماشوم سمیع‌ الله ستایلی او نغدي مرسته یې ورسره کړې.

افغان ماشوم سمیع‌ الله چې د لوګر ولایت اوسېدونکی دی، دا مهال د خیبر پښتونخوا په اکوړه کې د کډوالو په یو کمپ کې له خپلې کورنۍ سره ژوند کوي.

ښاغلي وزیر خلیفه سراج الدین حقاني د ماشوم د ستاینې دې کتنه کې هغه سره د تعلیم لپاره مالي مرستې، د راتلونکو زده‌کړو ملاتړ او په خپل هېواد افغانستان کې د عزتمنده ژوند کولو ژمنې ورکړې او تر څنګ یې د تشویق په موخه نغدي مرسته او یو لیپ ټاپ ورته ډالۍ کړی.

د یادونې وړ ده، چې سمیع الله هغه افغان ماشوم دی چې ریاضي حسابونو کې بې ساری استعداد لري او د ګڼو پېچلو حسابونو پایله په ډېر لنډ وخت کې وړاندې کوي.