د اوبو او انرژۍ وزارت خبر ورکړی، چې د اوبو او انرژۍوزارت د تخنیکي مسؤلینو او د عزیزي انرژي شرکت د استازو ترمنځ د انرژي په پروژو کې د ګډو همکاریو او همغږیو رامنځته‌کولو په موخه د همغږۍ ناسته ترسره شوه.

یاد وزارت ویلي، چې دا ناسته د انرژۍ معین ملا عبدالهادي یعقوب تر مشري لاندې د سلاکارانو، رئيسانو، د وزارت د تخنیکي مسؤلینو او د عزیزي انرژي شرکت د استازو په شتون کې ترسره شوه، چې د انرژي پروژو د چارو پيل د څرنګوالي، د فعالیتونو پرمخ وړلو د بهیر او پروژو د لومړیتوب‌ بندي په هکله بحث او د اندونو تبادله وشوه.

وزارت زیاته کړې، چې د ناستې په بهیر کې همداراز پرېکړه وشوه، چې د دواړو لورو تخنیکي ټیمونه دې سر له سبا د سرچینو او مطالعاتو د ارزونې په موخه د بېلابېلو ولایتونو د پروژو سیمو ته سفر وکړي او د خپلو ارزونو پایلې دې له وزارت سره شریکې کړي.

د یادونې وړ ده، چې وړمه ورځ د اوبو او انرژۍ وزارت او د عزیزي انرژي شرکت ترمنځ له بېلابېلو سرچینو څخه د انرژي تولید لپاره د ۱۰ زره مېګاواټه په وړتیا برېښنا د تولید د پانګونې یو تفاهم‌لیک لاسلیک شو.