د بهرنیو چارو وزیر مولوي امیرخان متقي د ملګرو ملتونو سیاسي استازولۍ یا یوناما مشرې روزا اتونبایوا سره کتنه کې د راستنېدونکو کډوالو پر اړتیاوو، نړۍ کې د مېشتو افغانانو پر ستونزو، خصوصي سکټور ودې او پانګونې پر جلب خبرې کړې دي.

بهرنیو چارو وزارت ویلي، مولوي امیرخان متقي اروپاکې د مېشتو افغانانو ستونزو ته د افغان حکومت لاسرسي او هغوی ته د قونسلي خدماتو وړاندې کولو غوښتنه کړې.

متقي همداراز غوښتنه کړې، چې یوناما دې په خپلو راپورونو کې پر واقعیتونو تمرکز وکړي.

بل‌خوا د یوناما مشرې ویلي، یوناما راستنېدونکو کډوالو ته د ژوند اسانتیاوو سربېره افغانستان کې د کاري فرصتونو رامنځته کېدو او پانګونې جلب ته زمینه برابروي.

نوموړې ژمنه کړې، چې د ملګرو ملتونو او امنیت شورا راتلونکو ناستو کې به له نړېوالو سره افغانستان کې د راغلو پرمختګونو او فرصتونو په اړه معلومات شریک او د افغان حکومت پیغامونه به ولېږدوي.