عامې روغتیا وزارت خبر ورکړی چې د نورستان ولایت د وانت ولسوالۍ په نشیګرام سیمه کې یو روغتیایي مرکز ګټې اخیستنې ته وسپارل شو. 

د یاد وزارت په خبرپاڼه کې راغلي، چې دغه مرکز به د سیمې اوسېدونکو د روغتیایي ستونزو په حل کې تر ډېره مرسته وکړي.

له بلې خوا د نشیګرام اوسېدونکي د دې مرکز په جوړېدو خوښي څرګندوي او زیاتوي، چې له دې وړاندې به د روغتیایي خدماتو لپاره تر لرې سیمو تلل او له امله یې له ګڼو ستونزو سره لاس او ګرېوان وو.

د یادونې ده، چې تر دې وړاندې عامې روغتیا وزارت د نورستان په نورګرام ولسوالۍ کې د ۲۸ میلیونه افغانیو په لګښت د یو بل روغتیایي مرکز د جوړېدو چارو د پیل خبر ورکړی و.