انادولو ترکي اژانس په راپور کې وایي، د پاکستان پلازمېنه اسلام آباد کې د پولیسو له لوري کور په کور تلاشي پیل شوې او ګڼ شمېر کډوال په زور د کورونو پرېښودو ته اړ شوي.

سرچینې ویلي، د کډوالو نیولو په موخه د پولیسو پلټنې د پلازمېنې اړوند بهارکو «بي ۱۷» او «اف ۱۸» سیمو کې پیل شوې.

اژانس وايي، دغه پلټنې د پاکستاني چارواکو په امر پیل شوې او د دغه هېواد پولیسو هغه کډوال هم نیولي چې د ویزو تمدید ته منتظر و.

پاکستان وخت ناوخت افغان کډوال د افغان حکومت پر ضد د فشار د یوې وسېلې په توګه کاروي، خو تر اوسه دوی نه دي توانېدلي چې خپل فرمایشات پر افغانستان اسلامي امارت ومني.