د ټولګټو چارو وزارت وایي، په زابل ولایت کې د پنځه پایو پلونو کار بشپړ او ګټې اخیستنې ته سپارل شوي دي.

یاد وزارت په خپره کړې خبرپاڼه کې ویلي، چې په زابل کې یې د لس پایې پلونو کار پیل کړی، چې له ډلې یې د پنځو کارونه بشپړ او د پاتې نورو به په نږدې راتلونکې کې بشپړ شي.

خبرپاڼه کې دغه راز ویل شوي، چې دغه پلونه د زاړه نورک، تازي رباط، لب دریا، حسن کاریز او خارجوی سیمو کې رغول شوي چې د سنګر مانده، سوخته، نوبهار، مغلیز او شینکۍ پلونو چارې به هم ډیر ژر بشپړې او د خلکو د تګ راتګ په وړاندې به شته ستونزې هواري شي.

دا په داسې حال کې ده چې څو ورځې وړاندې د ټولګټو وزارت ویلي و، چې په روان ۱۴۰۲ کال کې یې د هېواد په بېلابېلو برخو کې د لویو لارو، سړکونو، پلونو او پلګوټو د بیا رغونې ۹۳ پروژې پیل کړي، چې ځینې بشپړې او د نورو لا هم د رغونې چارې دوام لري.