د تاشکند نوی سفیر کابل ته رارسېدلی
آوا خبري اژانس د ازبکستان «دنیا» خبري سرچینې له مخې وایي، تاشکند په افغانستان کې نوی سفیر ټاکلی.
دا نوی سفیر تېره ورځ (يکشنبه) د لړم په شپږمه کابل ته رارسېدلی.
آوا اژانس د کابل لپاره د ازبکستان نوي سفیر نوم اویبک عثمانوف ښودلی دی.
عثمانوف تر دې وړاندې په مصر او پاکستان کې د سفیر په توګه دندې ترسره کړې او له ۲۰۱۱ تر ۲۰۱۲ پورې د ازبکستان هېواد د بهرنیو چارو مرستیال وزیر هم وو چې اوسمهال په افغانستان کې د یادګار شادمانوف ځای ناستی شوی.
د یادونې وړ ده، چې تاشکند اسلامي امارت سره د سوداګریزو اړېکو د پراختیا پر مهال له افغانانو سره د ټرانزېټ، ټرانسپورټ، برېښنا او بشري مرستو په برخو کې لازمې همکارۍ ته ژمن دی.
