د ریاست الوزرا اداري مرستیال مولوي عبدالسلام حنفي له یو شمېر سوداګرو سره په کتنه کې ویلي، اسلامي امارت هغو سوداګرو او پانګوالو ته چې له ګاونډیو هېوادونو څخه هېواد ته د خپلو سوداګریو او فابریکو د تاسیساتو راوړلو غوښتونکي دي د ګمرکي معافیت ترڅنګ په صنعتي پارکونو کې ځمکې ورکوي.

د ریاست الوزرا اداري مرستیال له دفتره په خپره شوې خبرپاڼه کې ویل شوي، په دې لیدنه کې ښاغلي حنفي سوداګرو ته ډاډ ورکړی، چې د سوداګرو امنیت ته لومړیتوب ورکوي او هغوی ته یې بېلابېلې اسانتیاوې په پام کې نیولې دي.

 په دې لیدنه کې سوداګرو په هېواد کې د اقتصادي او سوداګریز وضعیت په اړه ویلي، په تېر وخت کې د سوداګرو او پانګوالو سر او مال خوندي نه وو، چې دې موضوع د هغوی پر سوداګرۍ او کار هم منفي اغېز کړی و.

دغو سوداګرو زیاته کړې، په هېواد کې د امنیت له ټینګښت وروسته اوس په بېلابېلو برخو کې پانګونې ته چمتو دي.

ښاغلي حنفي داسې مهال پانګوالو ته په صنعتي پارکونو کې د ځمکو د ورکړي خبره کړې، چې ځینو پانګوالو ویلي چمتو دي چې له ګاونډیو هېوادونو څخه خپلې فابریکې هېواد ته را انتقال کړي.