د کابل امنیه قومندانۍ وایي، د دې قومندانۍ د نشه یي توکو پر وړاندې د مبارزې مدیریت په تېرو دوو کلونو کې د کابل ښار له بېلابېلو برخو څخه ۲۸ زره په نشو روږدې راټول کړي. 

د یادې قومندانۍ ویاند خالد ځدراڼ په خپله ایکس پاڼه په دې اړه ویلي، په راټول شویو روږدو کسانو کې، چې ښځې او ماشومان هم پکي شامل دي د ډیرو یې درملنه شوې او بیرته خپلو کورونیو ته سپارل شوي دي. 

د یادونې ده، چې واک ته د اسلامي امارت له بیا رسېدو وروسته په ټول هېواد کې په نشه یي توکو د روږدو د راټولو او درملنې کمپاین پیل کړې، چې تر دې مهاله یې د سلګونو زره روږدو درملنه کړې ده. 

دا په داسې حال کې ده چې په افغانستان کې د تېر ادارې پرمهال شاوخوا ۳.۵ میلیونه ځوانان د بېلابېلو دلیلونو له کبله په نشو روږدي شوي وو، چې ډېرو یې د ناوړه او بد حالت له کبله خپل ژوند هم له لاسه ورکړی دی.