تېرو لسو ورځو کې ۴۴ میلیونه ډالر لیلام شوي او سبا ۱۶ میلیونه نور لیلامېږي
د افغانستان بانک تازه خبر ورکړی، چې سبا چهارشنبه د داوطلبۍ له لارې ۱۶ میلیونه امریکايي ډالر د لیلام په ډول پلوري.
دې حکومتي ادارې په داسې حال کې د یادو ډالرو د لیلام خبر ورکړی، چې تېرو لسو ورځو کې هم د افغانستان بانک ۴۴ میلیونه امریکايي ډالر د افغانۍ ارزښت ساتلو په موخه د لیلام په ډول پلورلي وو.
د افغانستان بانک له سوداګریزو بانکونو، د صرافۍ او پولي خدمتونو له شرکتونو څخه چې په شرایطو برابر وي، غوښتنه کړې، څو په دې داوطلبۍ کې ګډون وکړي او خپل حسابونه د لیلام د ورځې تر پایه پورې تصفیه کړي.
