د هند پوځ تېره شپه د پاکستان په بېلابېلو سیمو کې په ۹ اهدافو پراخ توغندیز بریدونه کړي، چې دغه اقدام د یو شمېر هېوادونو له لوري له غبرګون سره مخ شوی دی.

د امریکا ولسمشر ډونالډ ټرمپ دغه بریدونه د شرم وړ بللي او د هند او پاکستان ترمنځ د تاوتریخوالي اوږدمهاله سابقې ته یې په اشارې اندېښنه ښودلې.

ترکیې هم په یوه رسمي بیان کې سویلي اسیا کې د دوو اټومي قدرت لرونکو ترمنځ کړکېچ باندې اندېښنه ښودلې او د دواړو هېوادونو ترمنځ یې د زغم غوښتنه کړې.

پاکستان د دغو بریدونو په غبرګون کې پنجاب ایالت کې بېړنی حالت اعلان کړی او ټینګار یې کړی چې د هند د تېرې شپې برید به بې ځوابه پاتې نه شي.

د هند حکومت ویلي، دغه بریدونه یې د یاد هېواد تر کنټرول لاندې کشمیر پهلګام سیمه کې د اپرېل ۲۲مې خونړي برید ځواب کې کړي دي.

د یادونې ده، چې د هند تېرې شپې برید کې ۸تنه وژل شوي او تر ۴۰ زیات ټپیان شوي دي.