تېره شپه هند له څو ورځو انتظار وروسته په کشمیر کې پر سېلانیانو برید غچ کې پر پاکستان پراخ د بالستیک توغندیو بریدونه او د پوځي الوتکو بمبار وکړ.

هند دفاع وزارت وویل، چې دا عملیات د « سندور » په نوم و، چې نهه غیري پوځي اهداف یې په نښه کړي دي.

پاکستاني رسنیو ویلي، چې دا بریدونه د پاکستان په بېلابېلو سیمو شوي دي.

د پاکستان د پوځ د عامه اړیکو (ISPR) مشر ډګر جنرال احمد شریف چوهدري دغه بريد تائید کړی او ويلي يې دي، چې د هند لخوا په کوټلي، بهاولپور، مریدکي، باغ او مظفر آباد کې د توغندیو بریدونو کې ۸ پاکستانیانو ژوند بايللی، ۳۵ ټپیان شوي او دوه تنه لا درکه هم دي.

چودري رسنیو سره خبرو کې ادعا کړې، چې د پاکستان هوايي ځواک د دې بريدونو غبرګون کې دوه هندي جنګي الوتکې او یوه بې پیلوټه الوتکه رانسکورې کړې دي.

بلخوا پاکستاني رسنیو ویلي، چې پاکستاني پوځیانو هم د هند تر ولکې لاندې کشمیر کې پر هندي پوځیانو بریدونه کړي دي.

د پاکستان د پوځ د عامه اړیکو مشر زیاته کړې، زه غواړم په څرګنده توګه ووایم چې پاکستان به په خپل وخت او ځای کې دې بریدونو ته خامخا ځواب ووایی.

بل لوري ته بيا د پاکستان لومړي وزير شهباز شریف نن سهار د ملي امنیت کمېټې غونډه رابللې او د پنجاب اعلی وزیرې مریم نواز هم په پنجاب ايالت کې بېړنی حالت اعلان کړی دی.

د یادونې وړ ده، چې پاکستان خپل هوايي حریم د راتلونکو ۴۸ ساعتونو لپاره تړلی دی؛ چې شنونکو په باور کېدای شي دا جنګي کړکېچ لا پراخ شي.