په هرات ولایت کې زلزله ځپلو ته د کورونو تسلیمي پروسې پر دوام، د رباط سنګي ولسوالۍ خوش رباط او باغ زحمت سیمو کې ۳۶بابه نوي جوړ شوي کورونه د هرات د اطلاعاتو کلتور رئیس او علماوو شورا غړو په شتون کې سیمې زیانمنو اوسېدونکو ته تسلیم شول.

 د هرات ولایت د اطلاعاتو کلتور رئیس او زلزله ځپلو ته د رسېدنې کمېسیون ویاند مولوي احمد الله متقي وایي، دغه کورونه د اسلامي امارت له لوري په سټنډرډ او معیاري شکل جوړ شوي دي.

ښاغلي رئیس د دغو کورونو د تسلیمي پرمهال ویلي، د هرات زلزله ځپلو ته د ژمي په موسم کې د سون او خوراکي توکي هم وېشل کېږي.

په همدې حال کې زلزله ځپلو ته د رسېدنې کمېسیون غړو او د هرات علماوو شورا پلاوي چې سیمې ته راغلي وو په دې ولایت کې د زلزلې بحران مدیریت په برخه کې د اسلامي امارت هڅې ستایلې دي.

له بلې خوا د خوش رباط کلي اوسېدونکي د نویو معیاري کورونو له جوړېدو خوښ دي او ژمي موسم کې د لا زیاتو مرستو غوښتنه کوي.