د افغانستان اسلامي امارت د سیاسي کمېسیون غړي او د کورنیو چارو وزیر خلیفه سراج الدین حقاني ورور حافظ انس حقاني الجزیرې سره په ځانګړې مرکه کې په لوړ پوړو حکومتي مشرانو د امریکا له لوري د لګول شوې جایزې لغوه کول په سیاسي ډګر کې یوه لاسته راوړنه بللې.

انس حقاني یاده مرکه کې د امریکا له دې پرېکړې هرکلی کړی او ویلي یې دي، اوس افغانستان امن دی او اسلامي امارت د دوحې تړون ته ژمن دی او اوس وخت کې دې عمل ته اړتیا نه لیدل کیږي.

ښاغلي حقاني د اسلامي امارت په پنځو نورو غړو هم د امریکا له لوري د جایزې لغوه کېدو هیله ښودلې چې دا کار به د افغانستان او امریکا ترمنځ بندې دروازې پرانېزي.

انس حقاني ویلي، امریکا دغه اقدام د اسلامي امارت له لوري د یوه امریکایي وګړي د خوشي کېدو په بدل کې کړی دی.

د یادونې ده، چې امریکا د افغانستان کورنیو چارو وزیر خلیفه سراج الدین حقاني پر سر ۱۰میلیونه ډالر او د اسلامي امارت دوو نورو غړو حافظ عبدالعزیز حقاني او حافظ یحیی حقاني پر سر پنځه پنځه میلیونه ډالره جایزې لغوه کړې دي.