د اوسپنې پټلۍ ملي ادارې په یوه خبرپاڼه کې ویلي، چې تیره اونۍ د جدي له اتمې تر ۱۴ مې نیټې د اوسپنې پټلیو له لارې ۸۶ زره ۸۵۷ میټریک ټنه انتقالات تر سره شوي. 

خبرپاڼه زیاتوي، چې په یاده موده کې د حیرتان بندر له لارې ۶۱ زره ۱۴ ټنه، د آقینې بندر له لارې ۵ زره ۱۸۹ ټنه اود تورغونډۍ بندر له لارې ۲۰ زره ۶۵۴ میټریک ټنه د نفتي او غیر نفتي موادو انتقالات شوي. 

په همدې حال کې په خبرپاڼه کې راغلي، چې په دې موده کې د ۴۵۹ میټریک ټنه توکو صادرات او ټرانزیت هم تر سره شوی، چې ډیره برخه یې وچه میوه او کینو جوړوي. 

په ورته مهال د اوسپنې پټلۍ ادارې ویلي، چې هڅه کوي د اوسپنې پټلیو په بندرونو کې لا زیات د سوداګرو لپاره مناسب شرایط رامنځته او اړین سهولتونه چمتو کړي.