ډېری وختونه ميندې او پلرونه په دې هڅه کې وي، چې خپلو کوچنيانو ته لا صحي خواړه ورکړي، خو دا چې کوچنيان کوم څښاک بايد وکړي، په دې اړه څومره پوهاوی شته؟

د سي اېن اېن عربي له راپور سره سم څلورو مخکښو روغتيايي ادارو ټينګار کړی، چې د کوچنيانو د څښاک اندازې ته بايد پاملرنه وشي.

د دې ټينګار د روښانولو لپاره ياد چېنل د جورج واشنګټن پوهنتون د عامې روغتيا انسټيټيوټ (ميلکن) کې د روغتيا د پاليسۍ او مديريت له استاذې ډاکټرې لينا وين سره خبرې کړې دي. هغې څرګنده کړې ده، چې د کوچنيانو د خوړو په څېر د هغوی څښاک ته هم پاملرنه له دې امله اړينه ده، چې کوچنيان يو صحي غذايي سيستم ولري، څو د چاغښت، شکرې او د زړه د ناروغيو په څېر له نورو ډېرو وژونکو ناروغيو خوندي شي. آغلې وين زياته کړې ده، چې له خوږې ډک ګازي مشروبات او نور خواږه مشروبات د وزن له ډېرېدو او چاغښت سره ژوره اړيکه لري او د غاښونو د رژېدو لامل ګرځي. ځکه نو بايد ميندې او پلرونه دې ته بيدار وي چې بچيان يې کوم او څومره مشروب څښي؟

ډاکټرې لينا وين د دې پوښتنې په ځواب کې چې د ښوونځي يو کوچنی د ورځې څومره مايعات وڅښي؟ وويل: د بدن اوبه پوره کول عمر ته په کتو توپير کوي، د پوهانو د يوې کمېټې له څېړنو سره سم له ۵- ۸ کلونو کوچنيان بايد د ورځې ۴۰ اونسه مايعات وڅښي چې نږدې ۵ ګيلاسه کېږي.

خو له ۹- ۱۳ کلونو عمر لرونکي واړه بايد د ورځې له ۵۴- ۶۱ اونسو مايعات وڅښي، چې نږدې ۷ ګيلاسه کېږي. له ۱۴- ۱۸ کلونو عمر لرونکي بايد له ۷ تر ۱۱ ګيلاسو مايعات په ورځينۍ توګه وڅښي. دا عامې اندازې دي، ځکه د کوچني حجم، د هغه بدني فعاليت او د هغه د اوسېدو چاپېريال ته په کتو دا اړتيا توپير کوي.

دا چې کوچنيان شيدې يا جوسونه وڅښي که نه؟ ډاکټرې وويل چې د ۵ او ۸ کلونو ترمنځ کوچنيان دې يوازې ۴۰ اونسه شيدې د ورځې وڅښي او له دې لوی کوچنيان دې ۲۴ اونسه وڅښي. خو کومې شيدې چې خوږه ورګډه شوې يا ذايقه وراچول شوې ده (لکه د چاکليټو شيدې، د سټرابري شيدې او نور)، د ډېرې خوږې درلودو له امله بايد کوچنيانو ته ور نه کړل شي.

د مېوو اوبه يا جوسونه هم د ډاکټرې په وينا په لږه اندازه بايد وکارول شي، چې د ۵- ۸ کلونو کوچنيانو ته يوازې له۴- ۶ اونسو، له ۹-۱۳ کلونو عمر لرونکو ته له ۶-۸ او د ۱۴-۱۸ کلونو عمر لرونکو ته له ۸ اونسو کم ورکړل شي، دا په دې معنا چې نوي ځوانان هم بايد د ورځې له يوه ګيلاسه کم د مېوې جوس وڅښي؟

دا چې د شيدو نباتي بديلونه لکه د بادامو او سويا شيدې وکارول شي که نه؟ ډاکټرې ټينګار کړی چې يوازې د اړتيا پر مهال دې وکارول شي، لکه کوم کوچنی که د ځانګړي غذايي نظام په مخ وړو ته اړ و يا کوم کوچني له شيدو سره حساسيت درلود. د اړتيا پر مهال د نباتي شيدو د کارولو په وخت بايد دې ته هم پام وشي، چې خوږه ورګډه نه وي.

د رژيم د مشروباتو اړوند ډاکټرې لينا وين څرګنده کړې چې د دې موادو او په اوږد مهال کې يې د کوچنيانو او زلموټو پر روغتيا د اغېزو د سلامتۍ اړوند دلايل کم دي، ځکه نو بايد ډډه ترې وشي. دغه راز کوچنيان له هغو مشروباتو هم ځانونه وساتي، چې د تمرين پر مهال يا له تمرين وروسته يې د څښاک لپاره ترويج کېږي.