کابل کې د سیمه ییزې همکارۍ د ابتکار غونډې پایلې به څه وي؟
د افغانستان د بهرنیو چارو وزارت په نوښت وړمه ورځ کابل کې د ګاونډیو او د سیمې د هېوادونو کم سارې ناسته ترسره شوه.
د حریت نیوز د خبر له مخې دغه ناسته کې د ګاونډ او سیمې ۱۱ هېوادونو استازو او سفیرانو شتون درلود.
په دې ناسته کې د روسیې، چین، ایران، پاکستان، ازبکستان، ترکمنستان، قزاقستان، هند، ترکیې او د اندونیزیا د سفیرانو ترڅنګ د ډیپلوماټیکو ماموریتونو مشرانو ګډون کړی و.
ناسته کې پر بېلابېلو سیمه ییزو موضوعاتو خبرې وشوې.
د بهرنیو چارو وزارت ویلي، دغه ناسته یې په بریالیتوب سره مدیریت کړه. پایلې یې هم مولوي امیرخان متقي له رسنیو سره شریکې کړې.
د ناستې ټولو ګډونوالو افغانستان کې امن، ثبات او پرمختګ د ټولې سیمې په ګټه بللی. د حریت نیوز د خبر پر بنسټ د هر هېواد استازو خپلو ویناوو کې له افغانستان سره د اړیکو پراخوالو او تعامل ډېرولو خبره کړې.
د اندونیزیا هېواد استازي په دې ناسته کې دغه ډول سیمه ییزه همکاري د نړیوالې همکارۍ لپاره پيلامه ګڼلې.
یاد استازي په دې کنفرانس کې ټینګار کړی، چې افغان حکومت دې د نړیوالې ټولنې فعاله برخه وګرځي.
دې استازي د سیمې هېوادونو ترمنځ د مثبتو اړیکو جوړښت او د کم ساري امنیت کریډیټ اسلامي امارت ته ورکړی.
د ازبکستان سفیر په کې له افغان حکومت سره د اړیکو لا پیاوړي کولو او پراخولو خبره کړې.
د هند شارژدافیر هم ویلي، د هر هغه کوښښ ملاتړ کوي چې په افغانستان کې د ثبات او پرمختګ لامل کیږي.
نوموړي له افغانستان سره د دوامداره سوداګریزو اړیکو د ساتلو ترڅنګ د چابهار بندر له لارې افغانستان سره پر سوداګریزو اړیکو ټینګار کړی.
دغه راز د ترکیې سفیر جنک اونال ویلي، ترکیه له افغان حکومت سره د مثبت تعامل پالیسي ته ترجیح ورکړې.
همدغه شان د نورو ټولو هېوادونو استازو په خپلو څرګندونو کې د اقتصاد، اتصال او د اړيکو د رغون په ګډون پر بېلابېلو موضوعاتو خبرې کړي.
مهمه دا ده چې دغه غونډه کې د روسیې او چین په څېر د امنیت شورا دوو دایمي غړو ځانګړو استازو هم شتون درلود.
له دې معلومېږي چې د اسلامي امارت په ډیپلوماټیکو اړیکو کې تر پخوا لا ډېر د پام وړ ښه والی راغلی. دغه ډیپلوماټیک پرمختګونه د دې لامل کیږي، چې ګاونډيان او د سیمې هېوادونه افغانستان سره د مثبت تعامل زیاتوالي لپاره تر فکر او سلا مشورو وروسته د لا نور نږدیوالي په موخه لاس په کار شي.
نړۍ د اسلامي امارت بریالۍ حکومتولۍ ته تر پخوا ډېره تسلیم شوې او یقینا په کار هم ده، چې د یوه منطقه محور روایت پر مټ په افغانستان کې له راټوکېدلو فرصتونو څخه ګټه پورته شي او د بالقوه ګواښونو د مدیریت په تړاو له اسلامي امارت سره د نړۍ همغږي زیاته شي.
اسلامي امارت خو د خپلې حکومتولۍ په دوام کې هر وار د سیمې او نړۍ له هېوادونو سره پر مثبت تعامل ټینګار کړی. په کار دا ده چې دغه مثبت تعامل د دواړو خواو له اړخه غني شي.
افغان حکومت د سیمې او نړۍ هېوادونو ته وښوده، چې د مشترکو ګټو پر اساس داسې ګډ کار په کار دی، چې د ټولو هېوادونو په خیر وي. د مشترکو ګټو پالل به هغه مشترک ګواښونه هم دفع کړي، چې هر هېواد په داخل کې د یو بل په نفع او فایده وي.
یقیناً اسلامي امارت نړۍ ته وښوده، چې ډیپلوماټیک ابتکار لري او عملاً يې هغه هڅې چلنج کړې، چې غواړي په لوی لاس له افغان دولت سره د تعامل مخه ونیسي. دې ناستې نړۍ ته په ډاګه کړه، چې له افغان حکومت سره د تعامل د مخنیوي هڅو خپل اغېز بایللی دی. ښکاره ده چې دغه ډیپلوماټان به خپلو اړوندو هېوادونو ته د اسلامي امارت د منطقه محور ابتکار پیغام رسوي. هغوی چې افغان دولت ته د نړۍ تعامل لپاره ناسم سازشونه کوي، ډېر ژر د خپلې دغې نظریې شکست ننداره کړي.
د اسلامي امارت روانو ژوندیو هڅو د هر افغان دا هیلې غوړولي، چې اوس افغانستان عملاً د سیمې د هېوادونو اقتصادي شریک دی، نو په همدې اساس به د سیمې هېوادونه یو له بل سره په وصلیږي او افغانستان به د مرکزي رول په لوبولو سره د جنوبي او مرکزي آسیا ترمنځ د وصل نقطه ګرځي.
