افغانستان او سوریه به منظمې ډیپلوماټیکې اړیکې رامنځته کړي
د افغانستان بهرنیو چارو وزیر مولوي امیرخان متقي د سوریې انتقالي حکومت د بهرنیو چارو وزیر اسعد حسن الشیباني سره ټيلفوني خبرې کړې دي.
مولوي امیرخان متقي دې ټیلفوني مکالمه کې له بریا وروسته د سوریې حکومت د عفوې او ښې حکومتولۍ لپاره دریځونه ستایلي او هیله یې څرګنده کړې، چې افغانستان او سوریه وکولی شي منظمې ډپيلوماټیکې اړیکې رامنځته کړي.
د بهرنیو چارو وزیر همداراز ویلي، افغانانو نږدې نیمه پېړۍ کړاوونه لیدلي او د سوریې اوسنی وضعیت ښه درک کولای شي.
بلخوا د سوریې انتقالي حکومت د بهرنیو چارو وزیر په خپل وار ویلي، د ښکېلاک پر خلاف د افغانانو شل کلنه مبارزه مهمه تجربه وه چې زده کړې ترې کېدای شي.
نوموړي هیله څرګنده کړې چې د دواړو هېوادونو ترمنځ اړیکې لا پراخې شي او د دواړو لوریو پلاوي لیده کاته ولري.
