د انسان تښتوونکو پر ضد جدي مبارزه روانه ده
د افغانستان کورنیو چارو وزارت وايي، تېر کال یې په ټول هېواد کې پر انسان تښتوونکو کړۍ راتنګه کړې او پر ضد یې ۲۵۰ عملیاتونه کړي.
د کورنیو چارو وزارت مسؤلینو د امارتي ادارو د یو کلنو لاسته راوړنو د تشریح پروګرام کې وویل، همدې عملیاتو کې یې ۷۶ انسان تښتوونکي نیولي او ۳۴ نور یې وژلي دي.
کورنیو چارو وزارت چارواکو همداراز ویلي، د امنیتي ځواکونو د قاطع او دقیقو عملیاتو پایله کې د جرمونو کچه ۳۰ سلنه راکمه شوې ده.
په ورته مهال د کورنیو چارو وزارت چارواکو ویلي، تېر کال کې ۱.۷ میلیونه پاسپورټونه او له ۲۵۰ زرو زیات د موټرو پلیټونه هم وېشل شوي دي.
