نړیوالې رسنۍ خبر ورکوي، چې د روسیې ولسمشر ولادیمیر پوتین په یو رسمي سفر د شمالي کوریا پلازمینې پيونګ يانګ ته رسېدلی دی.

د العربیه خبري شبکې د خبر پر اساس پوتین د مسکو او پیونګ یانګ ترمنځ د اړیکو د پیاوړتیا او پراختیا په موخه دې هیواد ته تللی، چې کیم جون اونګ یې تود هرکلی کړی دی.

کرملین ماڼۍ هم ویلي، چې د دې سفر هدف د دواړو هېوادونو ترمنځ د دفاعي همکاریو پیاوړي کول او پراخول دي.

د یادونې وړ ده، چې تېر کال د شمالي کوریا مشر کیم جون اونګ مسکو ته سفر کړی و او وروسته له ۲۴ کلونو څخه د روسیې ولسمشر ولادیمیر پوتین پیونګ یانګ ته سفر کوي.

دا په داسې حال کې ده، چې په دې ورستیو کې د دې دواړو هیوادونو ترمنځ امنیتي او دفاعي همکارۍ زیاتې شوي، چې په وروستي اقدام کې تېره اونۍ شمالي کوریا لس زره له بېلابېل ډوله وسلو څخه بار کانټینرونه مسکو ته ولېږل.