د کابل او مسکو ګډې هڅې کولای شي په سیمه کې د ګواښونو مخه ونیسي
د ریاست الوزراء سیاسي مرستیال مولوي عبدالکبیر د افغانستان لپاره د روسیې ولسمشر ځانګړي استازي ضمیر کابلوف سره په کتنه کې د افغانستان په اړه د مسکو دریځ هرکلی کړی.
ښاغلي مولوي عبدالکبیر ویلي، د کابل او مسکو ګډې هڅې کولای شي په سیمه کې د ګواښونو مخه ونیسي.
نوموړي د مسکو فارمټ کې افغانستان ته د رسمي غړیتوب ورکولو هيله هم کړې ده.
بلخوا په دې کتنه کې ضمیر کابلوف ویلي، مسکو په ملګرو ملتونو کې د اسلامي امارت استازي ته د افغانستان د څوکۍ ورسپارلو غوښتونکی دی.
ضمیر کابلوف له اسلامي امارت سره د روسیې مثبتو اړیکو پر دوام ټینګار ترڅنګ ویلي، چې روسي پانګوال په افغانستان کې پانګونې ته لېواله دي.
