د افغانستان صنعت او سوداګرۍ وزیر پاکستان کې له افغان سوداګرو سره وکتل
د صنعت او سوداګرۍ وزیر نورالدین عزیزي پاکستان ته د سفر په مهال پاکستان کې مېشت افغان سوداګرو او استازو سره ولیدل او هغوی ته یې د اسلامي امارت له لوري د بشپړ ملاتړ ډاډ ورکړ.
ښاغلي عزیزي د افغان کډوالو د اېستلو په پروسه کې د حل لارو موندلو لپاره د دوه اړخیزو خبرو اترو پر اړتیا ټینګار وکړ او د ملګرو ملتونو د کډوالو د عالي کمېشنرۍ د معیارونو پر بنسټ یې د کډوالو د رضاکارانه راستنېدو غوښتنه وکړه.
یاده دې وي، چې ښاغلی عزیزي پرون د یوه لوړ پوړي پلاوي په مشرۍ اسلام آباد ته سفر وکړ، څو له پاکستان سره د سوداګرۍ او ترانزېټ برخه کې ستونزې حل کړي.
