د روسیې ولسمشرۍ ماڼۍ تازه د امریکا او ایران ترمنځ د اټومي پروګرام د کړکېچونو حل ته چمتوالی ښودلی.

د مسکو له لوري دا چمتووالی وروسته له هغې ښودل کېږي چې د امریکا ولسمشر ډونالډ ټرمپ ایران ته د اټومي موافقې په نه صورت کې  د بې مخینې بمبارۍ خبرداری ورکړی دی.

رویټرز خبري اژانس وايي، مسکو په وار وار سیمه کې د اندېښنو مخنیوي په موخه د واشنګټن او تهران ترمنځ د منځګړیتوب وړاندیز کړی.

د کرملین ویاند دیمیتري پیسکوف ویلي، مسکو له خپل ایراني شریکانو سره د اټومي تاسیساتو په اړه په پرلپسې ډول مشوره کې دی.

نوموړي د دغه ستونزې په سوله ییز حل ټېنګار کړی او دې برخه کې یې هر ډول همکارۍ ته چمتووالی ښودلی.

د روسیې بهرنیو چارو وزارت مرستیال وزیر سرګي ریابکوف، پر ایران د ټرمپ له لوري د بمباریو څرګندونې ګڼو هېوادونو کې د وضعیت پېچلتیا بللې.