امریکا افغانستان کې د سولې او امنیت ټینګښت کې د قطر د رول ستاینه کړې
د قطر د بهرنیو چارو وزارت ویلي، د امریکا بهرنیو چارو وزیر مارکو روبیو د قطر لومړي او بهرنیو چارو وزیر محمدبن عبدالرحمن بن جاسم آل ثاني سره په ټیلفوني اړیکه کې په افغانستان کې د امریکايي زنداني خوشي کېدو کې د قطر له هڅو ستاینه کړې.
د قطر بهرنیو چارو وزارت په خپره کړې خبرپاڼه کې لیکلي، مارکو روبیو په سیمه او افغانستان کې د سولې او امنیت ټینګښت برخه کې د قطر د رول ستاینه کړې.
تر دې وړاندې د افغانستان بهرنیو چارو وزارت هم د یوې خبرپاڼې په خپرولو سره د وروستیو پرمختګونو او امریکایي بندي ازادېدو برخه کې د اسانتیا رامنځته کولو له کبله د قطر او متحده عربي اماراتو له مهم رول منندویي کړې وه.
د امریکا بهرنیو چارو وزیر داسې مهال دغه څرګندونې کوي، چې افغانستان کې د اسلامي امارت له بیا واکمنېدو وروسته بشپړ امنیت ټینګ شوی او د افغانستان اوسني حکومتي چارواکو تل ټینګار کړی، چې چاته به اجازه ورنه کړي افغانستان کې موجود امنیت اخلال او یا له همدې ځایه نورو هېوادونو ته ګواښ پېښ کړي.
