د ایران بهرنیو چارو وزیر سیدعباس عراقچي ویلي، اسلامي امارت تېرو څه باندې درېیو کلونو کې په ټول افغانستان کې د امنیت په ټینګښت بریالي شوی دی.

عراقچي ویلي، د اسلامي امارت تر حاکمیت وړاندې په افغانستان کې بېلابېلې ډلې ټپلې حاکمې وې، چې د اسلامي امارت له راتګ وروسته وضعیت تغییر کړی او دا مهال په ټول افغانستان پوره حاکمیت لري.

نوموړي له افغان حکومت سره په خبرو اترو ټینګار کړی په خبره یې، ایران هڅه کوي افغانستان سره خپلې اړیکې پراخې کړي.

یاد لوړپوړي ایراني چارواکي همداراز ویلي، د کابل او تهران ترمنځ دوه اړخیزې همکارۍ کولی شي سیمه کې د امنیت په ټینګښت کې مرسته وکړي او د دواړو هېوادونو مشترکې ګټې خوندي کړي.

دغه څرګندونې داسې مهال مطرح کيږي چې د ایران بهرنیو چارو وزیر کابل ته په خپل وروستي سفر کې د پلازمېني کابل په واټونو پلی تګ راتګ وکړ او د کابل ښار په کافي پلورنځي کې راښکاره شو.