بغلان کې په یوه ترافیکي پېښه کې ۱۹تنه ټپیان شوي دي
د بغلان ولایت امنیه قومندانۍ د کابل – بغلان په لویه لار د ترافیکي پېښی خبر ورکړی دی.
د بغلان امنیه قومندانۍ ویاند مولوي شېراحمد برهاني ویلي، یو عراده ۵۸۰ مسافر وړونکی بس د شمالي سالنګ خنجان ولسوالۍ پل ملخان سیمه کې له سړک اوښتی، چې په پایله کې ۱۹ تنه مسافر ټپیان شوي دي.
د برهاني په خبره، د دې پېښي ټپیانو کې ۱۲ تنه نارینه، ۴ ښځې او ۳ ماشومان هم دي، چې د پولیسو له لوري د پلخمري ولایتي روغتون ته انتقال شوي دي.
