برېښنا شرکت ترکمنستان سره د یو بل کال لپاره د برېښنا پېرولو تړون لاسلیک کړ
د افغانستان برېښنا شرکت خبر ورکړی، چې ترکمنستان سره یې د ۲۰۲۵ کال د برېښنا د پېر تړون نوی کړی دی.
د دې شرکت عمومي اجرائیه رئیس ډاکتر عبدالباري عمر او ورسره مل پلاوي له ترکمنستان څخه د ۲۰۲۵ کال لپاره د برېښنا د پېر دغه تړون یاد هیواد ته د سفر پرمهال نوی کړی دی.
برېښنا شرکت ویلي، چې د دې تړون پر بنسټ به په څلورو مسیرونو (اندخوی، آقینې، بادغیس او تورغونډۍ ـ هرات) کې له ترکمنستان څخه برېښنا اخیستل کېږي.
د یادونې ده، چې د افغانستان برېښنا شرکت تېره اونۍ تاجکستان سره هم د ۲۰۲۵ کال لپاره د برېښنا د پېرولو تړون نوی کړ.
