الجزیرې تلوېزیون خبر ورکړی، چې د بندیانو انتقال دوولس بسونه چې شاوخوا ۶۰۰ ازاد شوي زندانیان یې لېږدول د غزې خان یونس ته رسېدلي دي.

په خان یونس کې راخوشي شویو کسانو لپاره ګڼ عام خلک او د هغوی د کورنۍ غړي راټول شوي وو.

تر دې وړاندې رویټرز خبري اژانس ویلي و، چې حماس جهادي غورځنګ نن سهار ۴ جسدونه پرته له کومو مراسمو سره صلیب ته وسپارل.

حماس تېره شنبې د بندیانو اوومې تبادلې په موخه شپږ اسرائیليان خوشې کړل چې په بدل کې به یې ۶۰۲ تنه فلسطیني بندیان خوشې شي خو، د اسرائیلو له لوري د یو شمېر ادعاوو له مخې یې د خوشې کېدو لړۍ وځنډېده.

سرچینو ویلي، له اسرائیلو د فلسطین په راخلاص شویو بندیانو کې ۱۵۱ تنه یې په عمري بند محکوم وو.

غزه کې اوربند د تېرې جنوري په ۱۹ مه پیل شو، په تېرو شویو شاوخوا ۳۸ ورځو کې حماس جهادي غورځنګ څو ځله اسرائیل په سرغړونې تورن کړل.

رویټرز د حماس جهادي غورځنګ له لوري سره صلیب ته د تازه څلورو جسدونو د سپارلو خبر کې ویلي، چې د اوربند دوهم پړاو برخلیک چې موخه ترې د جګړې پای دی، په اړه یې د ښکېلو خواو له لوري روښانه دریځ نه دی ښودل شوی خو امریکايي چارواکو ویلي، چې د اوربند دویم پړاو رامنځ ته کول حتمي دي.